"حلا" قابلت "زكي" في مقر النقابة، وشكرته على دعمه الكبير لها في أزمتها الأخيرة، كمان قدمت اعتذار لجميع فنانين مصر، وعلى رأسهم النقيب، وأكدت أنها تحترم وتقدر جميع الفنانين، موضحة إن الفن هيفضل رسالة حقيقية ومؤثرة، ومصر هتفضل بفنها وفنانينها القوة الناعمة في الوطن العربي.

وفي يوليو 2021، أثارت حلا شيحة جدل كبير على السوشيال ميديا وفي الوسط الفني كان أكبر، بعد هجومها على تامر حسني، واللي كانت بعد مشاركتها معاه فيلم "مش أنا"، وأعلنت تبرأها من الفيلم ومن المشاهد الرومانسية اللي جمعتها بتامر، واتهمته بإنه محذفش المشاهد زي ما طلبت منه ووعدها.

مش بس كده، وجهت رسالة لكل الفنانين قالتلهم فيها "إحنا يمكن نجحنا بمقاييس الدنيا بس صدقوني بمقياس ربنا إحنا لم ولن ننجح، أنا عارفة ومتأكدة إن زملائي جواهم خير، بس للأسف فتنة الشهرة والنجاح مش بتخلينا نشوف ونقيس الأمور صح".

ومن وقتها وحلا بعيدة كل البعد، عن أي فعالية فنية، وحذفت صور كتير من حساباتها على السوشيال ميديا اللي بتظهر فيها من غير حجاب، حاليًا كتير من جمهورها بيتوقع انفصالها عن زوجها الباحث الإسلامي، لكن لحد دلوقتي مش عارفين آه ولا لأ!