للمبتدئين في الرسم: أنواع رسومات بالرصاص سهلة التنفيذ
مش لازم تكون موهوب في الرسم بالفطرة علشان تبدأ ترسم. الرسم بالرصاص من أكثر الطرق إللي بتساعد الواحد على إنه يشعر براحة نفسية. وتعلم رسم بالرصاص نشاط حلو للتعبير عن النفس بطريقة صحية، وده لأنه بيخرج مشاعر متعددة وكمان بيزود التركيز والإبداع للشخص إللي بيمارس الرسم بإستمرار. حتى لو مبتعرفش ترسم، فممكن بسهولة إنك تنمي المهارة دي عن طريق تدريبات في الأول بسيطة. بدء الرسم بالرصاص تعتبر من أفضل الطرق لتعلم الرسم ومن بعدها تقدر تستخدم خامات وأنواع رسم أكثر وهتبقى دقيق أكثر بكثير فيها.
أنواع رسم بالرصاص سهلة التنفيذ:
١. الوجه والعين للرسم بالرصاص: الوجه وتفاصيله قد تعتبر معقدة إن الواحد يرسمها، ولكن لو التزمت بنسب محددة زي مثلاً إن الوجه مكون من ٦ أجزاء بيتقسم بالطول والعرض وتعرف كل جزء بيشمل إيه، فهتلاقي إن الموضوع أسهل مما تتصور وبالذات لو تم شرحه لك بدقة. ولو عرفت إن العين بتشبه في رسمها شكل اللوز فكدة هتعرف ترسمها بالرصاص بسهولة أكثر.
٢. رسم الجسم بالرصاص: وزي تقسيمة الوجه لأجزاء، فالجسم له نسب صحيحة، سواء للرجل أو المرأة، وبيبقى متقسم ل ٨ أجزاء وإتباع تقسيمة الجسم بالطريقة دي أفضل تقنية تتعلم بيها رسم الجسم ويفضل في الأول يكون بالقلم الرصاص برضه.
٣. أفكار رسومات بالرصاص: وهنا هتلاقي أفكار ثانية زي مناظر طبيعية أو فواكه أو أشجار، وورود أو حيوانات ممكن ترسموها بالقلم الرصاص. أفضل طريقة إن الواحد ينمي من مهارته في الرسم، هو تعلم أساسيات الرسم بطريقة صحيحة ومن بعدها يخصص وقت للتدريب، قد يكون يومياً أو إسبوعياً، بس المهم انك تجرب بإستمرار لغاية ما توصل لستايل الرسم إللي بتفضله، ومن هنا تشتغل عليه أكثر؛ إعادة، تكرار ومواظبة.
أدوات هتحتاجها للرسم بالقلم الرصاص للمبتدئين:
بنقترح عليك ترسم بقلم رصاص 2B أو 3B في الأول ولازم يكونوا مبريين كويس لأن ده بيساعدك توصل لدقة أفضل في الأول، بعد كدة ممكن تجرب أقلام رصاص بدرجات مختلفة. أما بالنسبة للورق، فممكن تجرب منه أنواع وسمك مختلف، بس يفضل في الأول تأخذ الأخف نوعاً منه وبعد كدة تشوف ورق بسمك أكبر لما تتمكن من الرسم بالقلم الرصاص بطريقة صحيحة. ممكن برضه تجرب تستخدم ورق شفاف علشان ايدك تتعود على شكل رسومات معينة، ومتنساش تستخدم أستيكة باللون الأبيض (مش إللي في القلم) وهتحتاج منديل تحت ايدك وأنت بترسم علشان الرصاص بيسيح وده ممكن يأثر على دقة الرسمة.
أهم أنواع وطرق التظليل في الرسم بالرصاص
يعتبر التظليل من أهم الأساليب إللي بيستخدمها الشخص إللي بيمارس الرسم بالرصاص، التظليل بيساهم مع نوعية الورق المستخدم في عمل تأثيرات مختلفة للرسم وإظهار الظل والضوء مع العمق أو القرب والبعد وغيرهم من التأثيرات المختلفة.
١- التظليل بالتنقيط - Stipple: هو أسلوب تظليل باستخدام القلم الرصاص يتم فيه عمل مناطق الضوء والظل في الرسومات باستخدام النقط. الفكرة الأساسية في هذا الأسلوب بسيطة فيمكن عمل مناطق غامقة تمثل الظل، باستخدام أكبر عدد ممكن من النقط وتكون المسافة بين النقط قريبة من بعضها. أما بالنسبة للمناطق المضيئة، يتم فيها عمل عدد أقل من النقاط والمسافة بين النقاط بتكون أبعد.
٢- التظليل بالتهشير - Hatch: التظليل بالتهشير أو الخطوط المتوازية هو من أشهر أنواع التظليل.التهشير هو التظليل في رسومات القلم الرصاص وإللي بيكون عن طريق عمل خطوط متوازية وإظهار النور بواسطة الخطوط القليلة والفراغ الواسع بين الخطوط أما إذا كانت الخطوط كثيرة و متقاربة فده بيدي إيحاء بالظل.
٣- التظليل بالخطوط المتقاطعة - Crosshatch: عادة بيستخدم الطريقة دي فناني الكاريكاتير، فالتظليل بالخطوط المتقاطعة لما نرسم بالرصاص بيكون بعمل خطوط متوازية وبعدين الفنان إللي بيستخدم الطريقة دي بيعمل طبقة ثانية من الخطوط المتوازية لكن بيكون في اتجاه معاكس للخطوط إللي عملها في الطبقة الأولانيه. التظليل بالطريقة دي بيدي كمان إيحاء بوجود نسيج وطبعاً القاعدة بتاعة الظل والنور برضه موجودة هنا لو المسافة بين الخطوط ضيقة يبقى ده علشان ندي إيحاء بالظل ولو المساحة بين الخطوط واسعة فده معناه الإيحاء بالنور .
٤- التظليل بالمزج - Blending: هو أشهر أنواع التظليل، يقوم فيه الفنان بخلق طبقات من التظليل متناغمة. ويستخدم الفنان إصبعه، أو قلم دمج وتسييح فيتخلص الفنان من أي خطوط حادة وبنلاحظ إن الفنان دايماً بيمزج بنعومة بين درجات مختلفة من تظليل القلم الرصاص.
:كورس تعلم الرسم أون لاين مع فنون
وأخيراً ممكن دلوقتي تبدأ تتعلم رسم بالرصاص وبخامات أخرى أون لاين في ساعات قليلة على موقعنا مع الفنانة التشكيلية هالة الشاروني. كورس الرسم بيشمل:
١. شرح وطريقة رسم الوجه بكل تفاصيله والجسم بالقلم الرصاص، دائرة الألوان والمنظور.
٢. وتدريب عملي ٣ رسومات بالقلم الرصاص.
٣. طريقة الرسم بالفحم وتدريب عملي.
٤. طريقة الرسم بألوان الأويل باستيل وتدريب عملي.
٥. ازاي تقرأ العمل الفني بعناصره المختلفة.
٦. مدارس الفن وفنانيها وأبرز الحاجات إللي بتميز كل منهم.
٧. ازاي الواحد يحسن من مهارته في الرسم بإستمرار.
٨. طريقة الرسم بخامات مختلفة: ماركر، ألوان اكريليك وأويل باستيل في تدريبين عمليين.